Sekere skole in visier, sê SAOU
2011-12-10 10:02
Pretoria. – Dit is onverstaanbaar waarom die Gautengse onderwysdepartement funksionele skole hul teiken maak en nie op die 80% wanfunksionerende skole fokus nie.
Só het die Suid-Afrikaanse Onderwysersunie (SAOU) Vrydag gereageer nadat skole in die Vaaldriehoek briewe gekry het dat hulle hulle moet regmaak om volgende jaar ’n klas vir Engelssprekende leerlinge te begin.
Dié opdrag is gegee ’n dag ná die hofuitspraak in die hooggeregshof in Johannesburg wat behels die onderwysdepartement – en nie die skoolbeheerliggaam nie – moet besluit oor die maksimum getal leerlinge wat ’n skool mag toelaat.
Chris Klopper, uitvoerende hoof van die SAOU, het gesê dit lyk of amptenare reeds op sommige skole fokus en hulle in kennis stel dat hulle volgende jaar nuwe leerlinge moet ontvang.
“Skole het dit ’n dag voor die skoolsluiting verneem sonder dat hulle vooraf geraadpleeg of enige reëlings getref is.”
Hy het gesê die onderliggende probleem is dat die departement van basiese onderwys ná jare nog nie norme en standaarde bepaal het vir die funksionele en verantwoordbare benutting van onderwysgeriewe nie.
“Die SAOU en ander organisasies dring sedert 1996 op die bepaling van norme en standaarde aan sodat daar ’n objektiewe maatstaf kan wees.”
Hy het gesê die Grondwet veroorloof skole met ’n enkeltaalmedium van onderrig. “Dit blyk nou uit die jongste viktimisering dat Afrikaanse skole uitgesonder word. Dit is onverdedigbaar dat amptenare toegelaat word om die onderwysregte van leerlinge en ouers van bepaalde skoolgemeenskappe te negeer.
“Die huidige stand van sake en jaarlikse konflik met betrekking tot die toelating van leerlinge en wanneer ’n skool as vol geag word, is onaanvaarbaar.”
Die Rivonia Primary School gaan teen die uitspraak appelleer. Die SAOU oorweeg dit om as vriend van die hof by die saak betrokke te raak.
Mnr. Esrah Ramasehla, president van Naptosa, sê dit is ’n ingewikkelde situasie en die minister het die verantwoordelikheid om te verseker elke kind woon skool by.
“Skole en onderwysers aan die anderkant weet gehalte-onderrig kan nie plaasvind in oorvol klasse nie. Dit is nie moontlik om dieselfde individuele aandag in ’n klas met 50 of selfs 80 leerlinge te gee as in een met 30 of 35 of 40 leerlinge nie.”
AfriForum het intussen ’n brief aan die Gautengse en basiese departemente van onderwys gestuur om te sê organisasies soos hy, Solidariteit, die FAK en die Federasie van Beheerliggame van Suid-Afrikaanse Skole (Fedsas) is gereed om ouers se reg om oor hul kinders se onderrig te besluit, tot op die hoogste nasionale en internasionale vlak te verdedig.
AfriForum het gesê die kwessie oor druk op Afrikaans as onderrigmedium het die afgelope twee weke heelwat aandag in die Nederlandse parlement en by die Nederlandse taalunie gekry.
Me. Barbara Creecy, Gautengse LUR vir onderwys, het gister met ’n afvaardiging van Fedsas vergader oor die hofuitspraak.
Sy het volgens ’n Fedsas-verteenwoordiger onderneem dat die proses wat vir volgende jaar in plek is, nie ondermyn sal word nie.
Volg Nuus24 op Twitter.
- Volksblad