Seiljagvaarder vertel van 80 dae op see ná mas breek

2012-04-25 10:00

Kaapstad – ‘n Sweedse seiljagvaarder is naby Richardsbaai gered nadat hy 80 dae lank vermis was, lui 'n berig.

Die Cape Times berig dat Stig Lundvall verlede week deur ‘n Griekse skip gered is nadat sy mas op 30 Januarie tydens ‘n swaar storm gebreek het.

Hy was gedwing om sy voorraad spaarsamig te gebruik en het in die seestrome gedryf deur gebruik te maak van ‘n tydelike mas, totdat hy ‘n fakkel so na as moontlik aan die land kon vrystel.

Hy het vanuit sy huis in Västerås gesê hy was op ‘n enkelreis na Australië en het Falmouth in die Verenigde Koninkryk aan die begin van Januarie verlaat.

‘n Vriend het amptenare in kennis gestel toe Lundvall ‘n week laat was volgens sy beplande aankoms.

Die seiljagvaarder het 20 kg in dié proses verloor en weeg nou ‘n skrale 65 kg.

Op die vraag oor of hy ooit weer sal seil, het hy gesê: “O ja, maar nie langafstand nie. Nooit weer oor oseane nie.”

– Volg Nuus24 op Twitter
 

- SAPA