Seerowers wil R33 m losprys vir gyselaars hê
2011-09-26 11:20
Johannesburg – Somaliese seerowers wat verlede jaar ‘n Suid-Afrikaanse paartjie ontvoer het, het ‘n losprys van R33 miljoen van die familie geëis, het ‘n koerant Maandag berig.
Bruno Pelizzari en Deborah Calitz van Durban het op 26 Oktober 2010 langs die kus van Tanzanië op hul seiljag gevaar toe seerowers hulle ontvoer het.
Pelizzari se suster Vera het Sondag met The Sowetan gepraat. Sy sê Pelizzari het haar op 5 September gebel en gevra dat die losprys betaal word.
“Ek weet julle doen wat julle kan. As hulle nie die losprys kry nie, gaan hulle ons dood maak,” het Pelizzari glo aan sy suster gesê.
Me. Pelizzari sê dis die eerste keer wat sy kontak met haar broer gehad het. Sy sê ‘n seerower genaamd Ali bel haar sedertdien op ‘n weeklikse basis.
“Ek het aan hom verduidelik dat ons nie ryk is nie. Ek het vir hom gesê dit gaan ‘n tydjie neem om die geld te kry. Ons is intussen gedwing om vir donasies te smeek,” het sy gesê.
Volg Nuus24 op Twitter.
- SAPA