Seekoeibul storm nadat kar hom tref
2011-03-05 09:48
Nelspruit. – ’n Erg beseerde seekoeibul het ’n insleepvoertuig eergisternag ná ’n ongeluk op die N4-deurpad naby dié stad aangeval en van die grond af opgelig.
Die ongeluk het omstreeks 21:00 sowat 20 km buite die stad gebeur toe ’n Ierse burger op pad van Johannesburg na Nelspruit teen die kolossale seekoeibul vasgejaag het.
Die Kia-voertuig was ’n wrak, maar wonder bo wonder het die bestuurder slegs ’n snywond aan die hand opgedoen.
Die beseerde dier het ’n ruk lank bedremmeld in die lang gras langs die pad gelê, het Luke Martin, hoof van die ambulansdienste in Nelspruit, gister vertel. In ’n stadium het die dier opgestaan en oor die snelweg begin loop.
Hy het op Martin afgestorm. “Ek kon net betyds agter die insleepvoertuig inspring. Die volgende oomblik het die dier die voertuig bestorm en sy slagtande in die voertuig se linkerdeur ingeslaan.
“Hy het die voertuig heeltemal opgelig en neergegooi voordat hy die bosse ingestrompel het.”
Paul Kriek van Van Wettens-insleepdiens het in die insleepvoertuig gesit.
“Dit was skrikwekkend! Ek is ’n diabeet en het so groot geskrik dat my suikertelling tot 19 opgeskiet het,” het hy gister aan Beeld gesê.
Beamptes van die Mpumalanga-parke-en-toerismeraad is ontbied om die beseerde seekoei op te spoor.
Martin en ’n beampte het met slegs die lig van penflitse die donker bosse ingesluip om na die dier te gaan soek.
“In ’n stadium het ek letterlik in die donker teen die dier vasgeloop. Hy het opgespring en verder die bos ingeloop.”
Die seekoei is sowat 30 m verder opgespoor en toe van kant gemaak. Daar is later vasgestel sy regteragterbeen is in die ongeluk gebreek.
“Hoewel sommige van die voorvalle lagwekkend was, soos toe ek soos ’n vlakhaas vir die seekoei weggehol het en Paul se geskree oor die radio dat die dier sy sleepwa aanval, is dit jammer dat die dier doodgeskiet moes word,” het Martin gesê.
- Volg nuus24 op Twitter
- Beeld