Seekoei uit swembad gered
2012-08-23 20:57
Johannesburg – ‘n Wild-reddingspan sou Donderdag ‘n seekoei uit ‘n swembad in Modimolle, Limpopo, red, het die Nasionale Vereniging vir die Voorkoming van Wreedheid teenoor Diere gesê.
Die span sou die seekoei verdoof en dan met ‘n hyskraan uit die swembad haal, het ‘n woordvoerder, Isabel Wentzel, gesê.
Sy het gesê die vyfjarige dier, wat deur sy trop uit ‘n wildreservaat gejaag is, sal na ‘n ander bestemming geneem word.
“Hy is uit die familie gestoot nadat ‘n ander baba gebore is, Die ouer seekoeie het hom nie meer verdra nie.”
Die seekoei het Dinsdag by die Monate Lodge se swembad ingeklim, maar hy kon nie weer uit nie.
Die swembad is groot genoeg vir die seekoei om in te swem, maar daar was geen manier vir die dier om uit te klim nie.
Baie van die water is sedertdien uitgetap om die proses te vergemaklik.
– Volg Nuus24 op Twitter
- SAPA
