Seekoei red sebravul in rivier
2010-12-03 06:35
Pretoria - Foto’s en beeldmateriaal van ’n seekoei wat eers ’n wildebees-kalfie en daarna ’n sebravulletjie van verdrinking in ’n sterk vloeiende rivier red, maak opslae.
Tom Yule, bestuurder van die Grumeti Expeditions-toeragentskap, het die reddings in Oktober op video vasgelê en sy seun Michael (13) het die foto’s geneem.
Yule, ’n Suid-Afrikaner wat nou in Tanzanië woon, het naby die noordelike Lemala Serengeti-tentkamp saam met ’n toergroep die wildebees- en sebramigrasie oor die Mara-rivier aanskou toe hulle die voorval gesien het.
“Dié tyd van die jaar migreer duisende sebras en wildebeeste van die Masai Mara-streek in Kenia suid na die Serengeti se suidelike grasvelde,” het Yule gesê.
“Een van hul groot struikelblokke is die Mara-rivier, wat op dié dag baie sterk gevloei het weens onlangse swaar reëns.”
Yule en verskeie ander toeskouers het gesien hoe ’n jong wildebeeskalfie deur die sterk waters meegesleur is en stroomaf begin dryf het.
“Die seekoei het die kalfie onmiddellik agternagesit en die kalfie liggies met sy snoet gestamp om sy kop bo water te hou en hom na die oorkantste wal te help.”
Op die wal het die kalfie uitgeklim en weer by die ander wildebeeste aangesluit.
Skaars vyf minute later het die water ’n sebravulletjie ook meegesleur.
“Die seekoei het toe die vulletjie op dieselfde manier na die oorkantste oewer gehelp.
“Dit was ongelooflik om te aanskou.”
Die vulletjie was volgens Yule heeltemal uitgeput toe hy uiteindelik by ’n klein rotseiland aan die oorkantste oewer uitgeklim en net gestaan en hyg het.
“Die seekoei het uitgeklim en die sebra liggies van agter gebyt en vorentoe gestamp asof hy die vulletjie wou aanmoedig om nie moed op te gee nie.
* Kyk hieronder na die beeldmateriaal.
Volg Nuus24 op Twitter.
- Die Burger