Schabir se aansoek lê by Zuma
2009-12-22 06:34
Kaapstad. – Die veroordeelde bedrieër Schabir Shaik moenie te gou opgewonde raak oor ’n kwytskelding voor Kersdag nie.
Vincent Magwenya, pres. Jacob Zuma se woordvoerder, het gister bevestig Shaik se aansoek om presidentskwytskelding lê op die staatshoof se lessenaar, maar het gesê: “Dis onwaarskynlik dat hy binnekort ’n aankondiging gaan doen.”
Dit kom ná berigte en foto’s eergister in Beeld se susterkoerante Rapport en City Press wat aandui dat Shaik sy huis buite die amptelike ure van sy paroolvoorwaardes verlaat het.
Hy is in Durban gesien terwyl hy rondry in ’n luukse swart BMW en inkopies doen.
Shaik ontken dat hy iets verkeerd gedoen het.
Magwenya het verduidelik Shaik se aansoek om kwytskelding is een van talle wat deur die president oorweeg word.
Volgens hom is Zuma aan geen sperdatum gebonde nie en sal hy op grond van alle beskikbare feite ’n besluit neem.
“Shaik se aansoek sal soos enige ander beoordeel word. Hy sal nie spesiale behandeling kry nie en die president sal ’n aankondiging doen wanneer hy dit goed dink. Die kans dat dit binne die afsienbare toekoms gaan gebeur, is egter skraal,” het Magwenya gesê.
“Die aansoek is geruime tyd gelede ingedien en dateer van voor Zuma se ampstyd.”
Komm. Mnikelwa Nxele, waarnemende streekkommissaris van die departement van korrektiewe dienste in KwaZulu-Natal, het ’n dringende ondersoek na Shaik se optrede gelas.
“Ons het reeds met Shaik gesprek gevoer en sy kant van die saak sal in die verslag vervat word. Dit behoort vanmiddag (gister) of môreoggend (vandag) afgehandel te wees, waarna dit vir oorweging aan die minister van korrektiewe dienste (me. Nosiviwe Mapisa-Nqakula) gestuur sal word.”
Cope het hom gister by die DA en die burgerregtegroep AfriForum aangesluit en Shaik se oënskynlike ongebondenheid veroordeel.
Phillip Dexter, Cope-LP en -woordvoerder, het in ’n verklaring gesê die party verwelkom Nxele se pogings om agter die kap van die byl te kom.
“Shaik is al op talle geleenthede in die openbaar afgeneem, sommige kere waar hy met ontspanningsaktiwiteite besig was.
“Dít nadat mnr. Ngconde Balfour, voormalige minister van korrektiewe dienste, nog in Maart gesê het Shaik is ‘dodelik siek’ en in die laaste stadiums van ’n terminale siekte.
“Hoewel gholf seker talle voordele het, is die behandeling van so ’n siektetoestand seker nie een van hulle nie.”
Dexter het gesê dit bewys daar bestaan een stel reëls vir die land se elite en ’n ander stel reëls vir Jan en alleman.
“Ons hoop die ondersoek is deeglik. As dit blyk gunsies is gedoen, sal ons die bron daarvan aan die kaak stel, selfs al lei dit na die uitvoerende gesag.
“Cope verwag in elk geval dat sy naam ingesluit sal word by ’n lys van name wat kwytskelding gaan kry. Ons veroordeel dit by voorbaat.”
- Die Burger
- Beeld