Sataniese ritueel: Groep wou meisie 'offer'
2011-11-17 07:02
Johannesburg – Twee moordbeskuldigdes het aan ’n familievriendin van Kirsty Theologo (18) beken hulle wou die meisie aan Satan offer soos ’n vers in Openbaring beskryf, het die Johannesburg-streekhof Woensdag gehoor.
Bernadette Lockhart, by wie Kirsty en haar 14-jarige vriendin soms gebly het, het getuig Harvey Isha (23) en ’n 16-jarige meisie wat ook van die moord op Kirsty aangekla word, het dit ’n dag ná die voorval aan haar gesê.
“Sy (die 16-jarige) het vir my gesê sy het gesien hoe Lindon (Wagner, 21) Kirsty se kop met ’n klip slaan. Sy het gesê dit was vir ’n satanistiese ritueel soos Openbaring 17 en 18 beskryf, van die prostituut wat na die altaar gebring en verbrand sal word en haar vleis wat geëet sal word,” het Lockhart getuig.
Die 16-jarige meisie, Isha, Wagner en Robin Harwood, Lester Evan Nathaniel Moody en Jeremy King (almal 18) staan tereg op aanklagte van moord op Kirsty, ’n gr.11-leerling aan die Hoërskool Die Fakkel, en poging tot moord op haar 14-jarige vriendin.
Ao. Joseph Yende, ondersoekbeampte, het Woensdag getuig Kirsty, die 14-jarige vriendin en die ses aangeklaagdes, was deel van ’n groep wat glo op 21 Oktober saam op een van die koppies agter The Glen-winkelkompleks in die suide van Johannesburg drank en dagga misbruik het.
Yende het getuig Isha het op pad soontoe petrol by ’n vulstasie gekoop. Op die koppie het van die aangeklaagdes ’n driehoek op die grond getrek en begin bid. Hy kon nie aan die hof verduidelik hoe of tot wie hulle gebid het nie, maar het wel gesê hy ondersoek ’n satanistiese verband in die misdaad.
“Daarna het van die aangeklaagdes Theologo begin wurg, haar vasgebind en petrol oor haar uitgegooi. Sy het teruggeveg, maar sy is met ’n klip oor die kop geslaan.” Die 14-jarige vriendin het brandwonde opgedoen toe sy haar brandende vriendin probeer help het. Sy sterk steeds in die hospitaal aan.
Lockhart het gesê dié meisie vrees die jong mans vir wat hulle aan haar en Kirsty gedoen het. “Hulle was almal vriende en as hulle so iets kan doen aan iemand wat hulle ken...” het Lockhart tranerig gesê.
Yende as Lockhart het gesê die gemeenskap sal ontevrede wees as die mans op borgtog vrygelaat word.
Slegs Moody en King se borgtogaansoek het voortgegaan nadat Isha aangedui het hy is nie reg om vir borgtog aansoek te doen nie.
Wagner en Harwood wil eers sielkundig waargeneem word voordat hul aansoek begin. Rod Montano, Moody en King se regsverteenwoordiger, het aangevoer sy kliënte is nie ’n vlugrisiko nie omdat hulle hulself aan die polisie oorgegee het. “Hulle is ook studente wat eksamens moet skryf.”
Die 16-jarige meisie het tot dusver apart van die vyf jong mans verskyn. In ’n voorlopige ondersoek is bevind sy moet as ’n minderjarige saam met die vyf aangekla word. Sy is vroeër in die sorg van haar ouers vrygelaat.
Volg Nuus24 op Twitter
- Volksblad