Sasolburg-betogers dreig met nóg geweld

2013-01-22 11:48

Zamdela – Betogende inwoners van Sasolburg het gedreig om nóg 'n spoor van verwoesting agter te laat indien die plaaslike regering nie sy planne heroorweeg om die gebied na 'n ander munisipaliteit te verskuif nie, berig Eyewitness News.

Inwoners van Sasolburg het Dinsdagoggend na die Moses Kotane-stadion in Zamdela gestroom ná gewelddadige betogings in die gebied.

Richard Baloyi, minister van samewerkende regering, sou na verwagting die inwoners toespreek, maar volgens Eyewitness News het inwoners die stadion omstreeks 11:00 verlaat omdat niemand opgedaag het nie.

Sommige inwoners het sambrele gedra om hulself teen die son te beskerm en 'n groep in die stadion het bevrydingsliedere gesing.

Kinders is ook aangesê om nie skool toe te gaan nie.

Paaie in die gebied was Dinsdag besaai met uitgebrande puin. 'n Polisiehelikopter het bo die gebied gesirkel om 'n oog op betogers te hou.

Altesaam 187 mense is in hegtenis geneem sedert die betoging Sondag begin het. Inwoners betoog oor nuwe planne vir die samesmelting van die Metsimaholo- en Ngwathe-munisipaliteit.

Konst. Peter Kareli, polisiewoordvoerder, het gesê geen geweld is Maandagaand aangemeld nie.

Betogers het vroeër Maandag twee vragmotors aan die brand gesteek en twee polisiebeamptes aangeval in 'n voertuig wat in die modder vasgeval het.

Waterkanonne en rubberkoeëls is gebruik om die skare uiteen te jaag. Sommige inwoners het die paaie versper en polisievoertuie met klippe bestook.
     
– Volg Nuus24 op Twitter