Sasolburg: Munisipaliteite kan steeds saamsmelt

2013-01-23 15:19

Sasolburg – Die munisipale afbakeningsraad het Woensdag gesê inwoners van die Zamdela-woonbuurt het te vinnig reageer deur te dink die samesmelting van die Sasolburg-munisipaliteit met dié van Parys sal permanent laat vaar word, berig Eyewitness News.

Betogings in die township het Sondag begin toe inwoners die strate ingevaar het om hul misnoeë oor die samesmelting te kenne te gee. Meer as 200 mense is reeds in hegtenis geneem in verband met die geweld in die gebied.

Richard Baloyi, minister van samewerkende regering, het Dinsdag aan inwoners gesê die samesmeltingsproses sal tydelik gestaak word terwyl 'n taakspan die lewensvatbaarheid daarvan assesseer.

Landiwe Mahlangu, voorsitter van die afbakeningsraad, het gesê slegs dié raad kan daardie besluit neem.

"Dit is 'n proses wat slegs die raad eintlik kan bestuur. Die raad het die laaste sê oor die kwessie. Ons sal binnekort met die minister vergader om uit te vind wat hy bedoel het."

Mahlangu het gesê openbare verhore oor die kwessie is nog nie gehou nie, omdat die raad eers in Augustus oor die samesmelting sou besluit.

– Lees meer hier

– Volg Nuus24 op Twitter