Sasolburg: Joernalis met mes gedreig
2013-01-22 12:49
Fotogalery - Chaos in Sasolburg
klik op klein foto bo om groter prentjie te sien
Sasolburg – ‘n Betoger het ‘n joernalis van die nuusagentskap Sapa met ‘n mes gedreig terwyl hy ‘n groep mense wat gedans het, afgeneem het.
“’n Man in sy middel-twintigs, wat ‘n kleurvolle kopdoek gedra het en nie ‘n hemp aangehad het nie, het my genader en gevra hoekom ek [beeldmateriaal] afgeneem het en dat ek moet ophou,” het die kameraman, Vumani Mkhize, gesê.
Mkhize was by die Moses Kotane-stadion in Zamdela, waar gewelddadige betogings oor die afgelope paar dae plaasgevind het. Hy was besig om ‘n groep af te neem terwyl hulle vir Ace Magashule, premier van die Vrystaat, gewag het.
“Ek het hom geïgnoreer en die man het weer gesê ek moet net begin afneem wanneer Ace Magashule opdaag. Hy het toe ‘n mes voor die skare uitgeruk. Ek het my kamera-toerusting opgetel en weggeloop.”
“Hy het toe na my geloop en gevra om na my toerusting te kyk. Ek het hom geïgnoreer en weggestap.”
Die betoger het die kamera-man daarna uitgelos.
Inwoners van Sasolburg het vroeër by die stadion saamgedrom waar Richard Baloyi, minister van samewerkende regerende en openbare sake, hulle na verwagting sou toespreek. Hulle het egter later in groepe in die rigting van Sasolburg beweeg ná Baloyi nie sy opwagting gemaak het nie.
Polisiebeamptes sê hulle het reeds 187 mense in hegtenis geneem sedert die betogings twee dae gelede ontstaan het.
Inwoners betoog glo oor ‘n voorstel om Sasolburg- en Parys se munisipaliteite saam te smelt.
Volg Nuus24 op Twitter
- SAPA
