Sanparke se bestuur skokkend
2009-07-14 10:23
Johannesburg - "Skokkend", was Diereregte Afrika (ARA) se reaksie op die nuus dat Sanparke honderde renosters en ander diere van die Kruger Nasionale Park wil verkoop. Jagters word ook toegelaat, en selfs aangemoedig, langs die grense van die wildtuin.
Michele Pickover, woordvoerder van ARA, het gesê: "Dit is nie net verregaande, kortsigtig en wreed nie, maar 'n onwettige en onwetenskaplike aksie wat die toonbeeld van swak bestuursbeleid is. Dit verpersoonlik die blatante verontagsaming van Sanparke se hooftaak: die beskerming van biodiversiteit en die plaaslike en internasionale erfenis-status van wildlewe, wat alle Suid-Afrikaners aan Sanparke toevertrou het.
Die aanval het gister gekom nadat minstens 10 van die 200 witrenosters wat onlangs op 'n veiling verkoop is, glo reeds gevrek het, berig Beeld.
Die organisasies is ook woedend omdat ’n renoster wat ’n Vrystaatse wildteler Vrydag by die wildtuin gekoop het, op die N4 tussen Witbank en Middelburg van ’n sleepwa afgeval het. Die sleepwa se band het glo gebars en dit het met renoster en al omgeslaan. Die dier het verskrik in die omgewing rondgehardloop voor dit gevang en weer op die sleepwa gelaai is.
“Die voorval bring talle etiese en morele kwessies ter sprake,” het me. Louise Joubert, eienaar van SanWild, ’n rehabilitasiesentrum en natuurreservaat naby Gravelotte in Limpopo, gister gesê.
Altesame 58 renosters is die afgelope 18 maande in die wildtuin vir hul horings gejag.
Sanparke wou gister geen vrae beantwoord nie en het gesê ’n dringende mediakonferensie sal vandag by sy hoofkantoor in Pretoria gehou word, berig Beeld.