Sangoma verkrag glo man

2012-08-02 15:33

Johannesburg – ‘n Manlike tradisionele geneser is in hegtenis geneem nadat hy glo ‘n man verkrag het, het die polisie gesê.

Ao. Xoli Mbele sê die 35-jarige sangoma het ‘n hut met die beweerde verkragtingslagoffer en ‘n ander man in die buitewyke van Johannesburg gedeel.

Na bewering het die sangoma Woensdagaand in die bed gekruip waarin die 24-jarige man geslaap het.

“Hy het sy klere uitgetrek en in die bed geklim. Hy het hom gegryp, oorval en verkrag.”

Dit is nie duidelik waar die derde man ten tyde van die beweerde verkragting was nie.

Mbele sê die slagoffer het die polisie van die voorval in kennis gestel.

Polisiebeamptes het ‘n paar uur later die sangoma by die hut in hegtenis geneem.

Hy sal binnekort in die Johannesburgse landdroshof verskyn.

Volg Nuus24 op Twitter 

- SAPA