Sanger se vriend by bedrogsindikaat betrek
2010-02-22 10:47
Johannesburg - Die eienaar van die motor waarin die kwaito-ster Mandoza was toe dit verlede week gebots het, is in hegtenis geneem vir sy beweerde betrokkenheid by 'n bedrogsindikaat, het die Valke Maandag gesê.
Musa Zondi, woordvoerder vir die Valke, het gesê dié man en agt ander is Donderdagaand in Honeydew in hegtenis geneem.
Die mans, waarvan die meeste Zimbabwiërs is, het glo mense se identiteite gesteel, en lenings by banke gemaak om eiendom en voertuie te koop en dit dan weer verkoop. Toe die banke die eienaars probeer opspoor, het hulle in 'n muur vasgeloop.
The Times berig 'n ondersoek het begin toe die polisie 'n Mini Cooper gevind het waarin Mandoza, wie se regte naam Mduduzi Tshabalala is, beseer is toe dit teen 'n boom in Weltevreden Park gebots het.
Mandoza, wat kopbeserings opgedoen het, was glo in die agtersitplek, terwyl sy vriend – die eienaar van die motor – 45 minute later op die toneel opgedaag het.
Volgens Zondi het die Valke gesê die feit dat die inligting dieselfde tyd as die ondersoek na die ongeluk uitgekom het, blote toeval is.
Hy het gesê dit is moontlik dat nog mense in hegtenis geneem kan word soos die saak aangaan.
"Vir nou is dit net agt," het hy gesê.
Zondi het gesê Mandoza word nie op die oomblik by die ondersoek betrek nie, en is nie in hegtenis geneem nie.
– Sapa