Sanders-moordsaak wéér uitgestel
2012-11-13 17:55
Video - Sanders-moordverdagtes in hof
Die mans wat na bewering die bokslegende Corrie Sanders vermoor het, het in die Brits-landdroshof verskyn. Kyk die video hier.
KYK
Johannesburg – Die saak van drie mans wat beskuldig word van die moord op die bokslegende Corrie Sanders is Dinsdag in die Brits-landdroshof uitgestel, het die polisie gesê.
Kapt. Amanda Funani het gesê die drie beskuldigdes sal in aanhouding bly tot hulle volgende hofverskyning op 29 Januarie volgende jaar.
"Die saak is uitgestel want hulle regsverteenwoordiger was nie in die hof teenwoordig nie en die polisie se ondersoek duur voort," het Funani gesê.
Samuel Mabena, 27, Chris Moyo, 25, en Paida Fish, 19, staan tereg op aanklagte van moord en roof met verswarende omstandighede.
Die saak is verlede maand uitgestel omdat die beskuldigdes aan die hof gesê het hulle regsverteenwoordiging moet "gefinaliseer" word.
Sanders is op 22 September by die Thatch Haven Country Lodge buite Brits doodgeskiet tydens 'n gewapende roof.
Hy het die volgende dag in die Kalafong-hospitaal in Pretoria aan sy wonde beswyk.
– Volg Nuus24 op Twitter.
- SAPA
