Sanders-moord: AfriForum prys polisie
2012-09-28 09:35
Kaapstad – AfriForum het die inhegtenisneming van drie verdagtes vir die moord op die bokslegende Corrie Sanders verwelkom.
Die burgerregte-organisasie het in ‘n verklaring ook die polisie met dié spoedige deurbraak geluk gewens.
Nantes Kelder, hoof van AfriForum se ondersoekeenheid, sê die verdagtes se inhegtenisneming sal die voormalige swaargewig-bokser nie terugbring nie, maar dat dit belangrik is vir misdadigers "om te weet dat hulle gevang sal word wanneer hulle die wet oortree."
Die drie Zimbabwiërs, tussen 19 en 20 jaar oud, is Donderdagoggend in die Oukasie- informele nedersetting naby Brits in hegtenis geneem vir die moord op Sanders.
Hulle sal na verwagting Maandag in die Brits-landdroshof verskyn.
Die polisie het inligting ontvang wat hulle na ‘n huis gelei het waar twee van die verdagtes vasgetrek is. Die derde verdagte is kort daarna, by ‘n ander huis, vasgetrek.
Gesteelde items is volgens die polisie ook in hul besit gevind.
Sanders (46) is verlede naweek, tydens 'n gewapende rooftog by 'n restaurant naby Brits in die maag geskiet. AfriForum het in ‘n verklaring gesê die organisasie se uitvoerende hoof, Kallie Kriel, was by dieselfde restaurant toe Sanders geskiet is.
Hy is na die Kalafong-hospitaal in Pretoria gehaas, waar hy beswyk het.
Volg Nuus24 op Twitter
