Samwu dien klag teen e.tv in
2010-04-20 23:14
Durban - Die Suid-Afrikaanse Munisipale Werkersunie (Samwu) het ’n klag teen e.tv ingedien nadat dié stasie na bewering ’n videogreep van verlede jaar gebruik het vir ’n bulletin oor vanjaar se munisipale staking, het die unie Dinsdag gesê.
Dié beeldmateriaal wat oor ‘n ander kwessie gehandel het, is Maandag in ’n nuusbulletin op eNews wat vanjaar se staking gedek het, uitgesaai sonder enige aanduiding dat dit argiefmateriaal is, het Samwu in ’n verklaring gesê.
Volgens die klag is dié beeldmateriaal gebruik om ’n verkeerde indruk van die staking te skep.
Samwu het gesê die beeldmateriaal wat gebruik is, het ‘n banier en lede van die munisipale vakbond Imatu gewys wat nie deel van die huidige staking is nie.
"Sonder om die kykers in te lig oor die feit dat die videogreep argiefmateriaal is, beteken dit hulle is oneerlik en onakkuraat,” het die verklaring gelui.
Vasili Vass, ‘n e.tv-woordvoerder, wou geen kommentaar lewer nie omdat die televisiestasie nog geen klag ontvang het nie.
-Sapa