Samesprekings in petroleumbedryf begin gou
2011-07-15 10:02
Johannesburg – Nuwe loonsamesprekings in die petroleumsektor sal Saterdag begin, het die Nasionale Brandstofwerkgewersvereniging (NPEA) Vrydag gesê.
"Daar is geen vergadering vandag (Vrydag) nie," het Mxolisi Ratsibe, voorsitter, gesê.
"Ons het 'n bemiddelaar en alles is beplan vir môre (Saterdag). Ons wag net vir een van die vakbonde om te bevestig."
John Appolis, beleidskoördineerder van die Chemical, Energy, Paper, Printing, Wood, and Allied Workers' Union (Ceppwawu), was nie onmiddellik beskikbaar vir kommentaar nie.
Appolis het Donderdag gesê die staking sal volgende week voortgaan omdat werkgewers te stadig is met onderhandelings.
Ratsibe het gesê dit is moeilik om te sê of die staking voortgaan.
"As ons eers aan die gang is, sal ons alles moontlik doen om die dispuut op te los."
Appolis het gesê werkgewers het geen salarisvoorstelle gemaak op die laaste vergadering, wat op 24 Junie gehou is, nie.
Die aanbod wat toe ter tafel gelê is, was 7%, maar die vakbonde eis 11%.
Reggie Sibiya, uitvoerende hoof van die brandstof-kleinhandelaarsvereniging, het gesê hy twyfel of 'n ooreenkoms die naweek bereik sal word.
"Ek dink die staking sal volgende week voortgaan. Ek dink nie hulle sal van die kwessies voor Maandag kan oplos nie."
Sibiya het gesê al word die kwessies oor die naweek opgelos, is die agterstande groot.
"Dit is 'n lang proses. Ek twyfel dat dit oor die naweek opgelos kan word."
Hy het gesê 200 vulstasies in Gauteng het teen Vrydagoggend leeg geloop en dat sommige vulstasies oornag voorraad ontvang het.
Sowat 70 000 werkers van die vakbonde Ceppwawu en Giwusa eis ’n minimum salaris van R6 000 per maand en ’n 40 uur-werkweek.
– Volg Nuus24 op Twitter
- SAPA