Samaritaan vermoor
2012-02-01 07:09
’n Barmhartige Samaritaan is in Centurion vermoor, vermoedelik deur ’n Zimbabwiese man oor wie se gesin hy hom ontferm het.
Smartryk Treurnich (37) is met ’n mes doodgesteek.
Treurnich was ’n pianis wat vroeër sewe jaar lank sy lewe in teaters gemaak het.
Sedertdien het hy egter ’n aandelemakelaar geword. Hy en sy vrou, Isabell, het ook ’n openbare hulporganisasie genaamd Collective Inheritance bedryf waardeur hulle mense in nood bygestaan het.
Mev. Treurnich het gister gesê hulle het hulle onder andere ontferm oor ’n gesin Zimbabwiese vlugtelinge. Hulle het vir dié gesin huisvesting in Wierdapark, Centurion, gekry.
Verlede week het die pa van die gesin gedreig om sy vrou dood te maak en sy het weggeloop. Hy was oortuig die Treurnichs weet waar sy is.
Ondanks hul ontkennings kon hulle hom nie van die teendeel oortuig nie.
Eergisteroggend is Treurnich na die huis in Wierdapark waar hy met ’n mes doodgesteek is.
Mev. Treurnich het gesê sy het in die loop van die oggend ’n oproep van die Zimbabwiese man gekry.
Hy het aan haar gesê: “Ek het jou man. Gee my my vrou, dan gee ek jou jou man.”
Toe sy weer ontken dat sy weet waar sy vrou is, het hy die telefoon neergesit. Agterna wil dit egter lyk of haar man teen daardie tyd reeds dood was.
Op mev. Treurnich se Facebook-blad het talle vriende gister vertel watter wonderlike mens haar man was.
Een vriendin het geskryf: “As daar gesê kan word dat een persoon dit reggekry het om sy droom te droom, leef en sterf, dan was daar seker nog net een persoon en dit was ou Smartie. Hy het gelewe om ander te dien en het ook daarvoor gesterf.”
Begrafnisreëlings was gister nog nie getref nie.
Konst. Nare Setati en kapt. Agnes Huma, albei polisiewoordvoerders, kon in twee dae nie die moord op Treurnich bevestig nie.
Hulle kon ook nie sê of die verdagte steeds op vrye voete is nie, berig Gerhard Pretorius.
– Volg Nuus24 op Twitter.
- Beeld