Salarisse lok vaardige onderwysers – Zuma

2013-03-08 12:46

Johannesburg – Ordentlike salarisse sal 'n belangrike rol speel om vaardige onderwysers te behou en te lok, het pres. Jacob Zuma Donderdag gesê.

"Dit is hoekom ons 'n presidensiële vergoedingskommissie op die been bring, wat die vergoeding en diensvoorwaardes wat die staat aan sy werknemers verskaf sal ondersoek. Dit sal begin met onderwysers," het Zuma in 'n toespraak by Gallagher Estate in Midrand gesê.

Zuma het die nasionale onderwystoekennings bygewoon.

Zuma het verder gesê besprekings is aan die gang oor 'n nuwe prestasie-bestuurstelsel vir onderwysers.

"Ons belê ook in onderwyserontwikkeling om onderwys in die land te verbeter."

Die regering beplan om die bestaande 112 onderwyssentrums en vyf provinsiale onderwysontwikkeling-instansies te gebruik om op plaaslike vlak meer ondersteuning aan onderwysers te bied.

Opleiding vir skoolhoofde en hul adjunkte sal ook verskaf word.

Zuma het die onderwysers wat toekennings ontvang het, gelukgewens en diegene wat nié ontvang het nie, aangemoedig om aan te hou met hul harde werk.

"Deur saam te werk kan ons meer doen om die gehalte van ons basiese opvoeding te verbeter."
     
– Volg Nuus24 op Twitter

- SAPA