Sakeman verdrink nadat hy werker uit Vaal red
2011-01-08 09:52
Parys - ’n Sakeman van die dorp het verdrink toe vloedwaters van die Vaalrivier hom meegesleur het.
Kobus Weideman (48), eienaar van die Rocky Ridge-vakansieoord buite Parys, het voor sy dood Donderdag eers een van sy werkers gered.
’n Dapper Weideman is oomblikke later in die watermassa dood.
Vloedwaters saai die laaste dae groot chaos op Parys. Terwyl die Nasionale Dierebeskermingsvereniging (NDBV) onverpoos werk om diere uit die vloedwater op Parys te red, het die Vrystaatse polisie gistermiddag in ’n noodstap ’n gesamentlike operasiesentrum (GOPS) op die dorp gestig.
“Groot probleme” word glo oor die naweek verwag en polisieduikers van Bloemfontein, Welkom, Sasolburg en Johannesburg is na Parys ontplooi om op gereedheidgrondslag te wees.
Kapt. Harry Nagel, Vrystaatse polisiewoordvoerder, sê die duikers wat van Bloemfontein en Welkom na Parys ontplooi is, het selfs ’n bykomende boot saamgevat.
Daar is reeds ’n boot vir duikers op Parys en Deneysville.
Marlene Weideman, wyle Weideman se gewese vrou, sê dit is kommerwekkend hoe mense die water aandurf.
“Mense gaan in die rivier in. Nou die dag moes ’n vrou en haar kind gered word. Ek het nou gesien hoe mense op ’n binneband in die water klim.”
Die Emfuleni-munisipaliteit in Gauteng asook die Suid-Afrikaanse weer-en-rampinligtingsdiens het vloedwaarskuwings uitgereik.
Linda Page van die departement van waterwese sê die watervlakke stroomaf in die Vaaldam gaan na verwagting vlakke bereik wat “laas gedurende die 1996-vloed gesien is”.
Suid-Afrika se riviere het toe uit hul nate gebars.
Huise is oorstroom, damme het gedreig om nedersettings met hul water mee te sleur, grensposte moes gesluit word en die Vaaldam het sy vloedterughouvermoë gebruik om die miljoene kiloliter water te beheer.
Christine Kuch, NDBV-woordvoerder, kon gistermiddag nog nie statistieke gee van hoeveel diere reeds gered is en hoeveel in die watermassa versuip het nie.
Kuch sê die probleem word vererger as die Vaaldam se sluise oopgemaak word.
Altesaam 17 van die Vaaldam se 60 sluise was Donderdagmiddag noodgedwonge oop. Dié dam in die groter Deneysville-omgewing was toe 108% vol. Donderdag was ’n piektyd in die vloedkrisis.
Klaas Mofomme, woordvoerder van die Emfuleni-munisipaliteit, het aan Riata Nel gesê eergister het 3,2 miljoen liter water per sekonde die Vaaldam binnegevloei.
Weideman was saam met twee van sy werkers besig om ’n stomp wat aan ’n hangbrug verstrengel geraak het, los te maak, toe hulle meegesleur is. Hy word oorleef deur twee kinders, Annelise (26) en Jacques (22), en sy verloofde, Esta.
- Volksblad