Sakeman se lyk in Jhb-hotel gevind
2010-12-26 17:54
Johannesburg – Die lyk van die omstrede Sandi Majali, 'n sakeman met hegte ANC-bande, is Sondag in die Sandton Quatermain-hotel in Johannesburg gevind.
"Paramedici het Majali op die toneel doodverklaar nadat hy deur sy meisie in die hotelkamer gevind is," het luit. kol. Lungelo Dlamini, 'n Gautengse polisiewoordvoerder gesê.
Die oorsaak van sy dood is onbekend, maar sy prokureur, John Ncebetsha, sê die familie is besig om 'n verklaring saam te stel.
Majali was betrek by 'n sogenaamde olieskandaal ná onthullings in 2005 gemaak is dat PetroSA ’n voorskot van R15 miljoen aan Majali se Imvume Management betaal het, het Die Burger berig.
Imvume het vier dae ná hy die voorskot ontvang het en op die vooraand van die algemene verkiesing in 2004, ’n skenking van R11 miljoen aan die ANC gemaak.
Hy is in Oktober in hegtenis geneem nadat die direkteurskap van Kalahari Resources van Brian Amos Mashile en Daphne Mashile-Nkosi na ‘n groep van agt individue, insluitend Majali, verander het.
Die Sunday Times het op 23 Augustus 2008 berig Majali het blykbaar transaksies met Irak aangegaan op ’n wyse wat VN-sanksies teen die vorige Irakse leier, oudpres. Saddam Hoesein, oortree het.
Lees meer hier
Volg Nuus24 op Twitter
