Sakeman dood in sy winkel gekry
2012-02-23 08:03
Upington – ’n Geliefde en bekende sakeman van dié dorp het vermoedelik in sy winkel, Indaba Soundkorp, selfmoord gepleeg.
Geskokte omstanders het Woensdagoggend in ongeloof in die straat voor die winkel saamgedrom waar Lionel Kurten (50) homself vermoedelik geskiet het.
Sy wit bakkie was nog in die parkeergebied, waar hy die vorige aand geparkeer het.
Sy lyk is omstreeks 08:30 in die pakkamer van sy musiekwinkel gevind. ’n Haelgeweer is langs sy lyk gekry.
’n Motorwag, wat goed aan hom bekend was en bitter ontsteld is oor die voorval, sê sy het Kurten nog Dinsdagaand gesien voordat sy huis toe is.
“Ons was nie vriende nie, maar hy het my vertrou. Hy het my altyd gestuur om goedjies vir hom te gaan haal, of iets by die winkel te koop,” sê die vrou wat anoniem wil bly.
Sy sê Kurten het Dinsdag nog vir haar R50 gegee en gesê sy moet vir haarself iets lekkers gaan koop.
Volgens haar het Kurten ontsteld voorgekom en aan haar gesê hy is hartseer.
Die vrou was Woensdag omstreeks 06:20 in die omgewing van die winkel waar die deur effens oopgestaan het. Dit was vir haar ongewoon, maar sy was bang en het weggeloop.
Sy het later die oggend by ander mense gehoor “iemand is geskiet”.
Kurten was glo ’n kankerlyer en is onlangs van sy vrou vervreem. Sy huis is ook in die mark.
Hy was veral bekend in musiekkringe.
’n Vrou wat by die winkel langs Indaba Soundkorp werk en ook anoniem wil bly, sê: “Hy groet ons altyd so vriendelik. Hy het gister nog hier buite staan en rook. Ek kan nie glo dit het gebeur nie.”
Kapt. Jacques September, polisiewoordvoerder, het bevestig die saak word ondersoek.
Hy sê geen misdaad word vermoed nie en ’n geregtelike ondersoek word gedoen.
Die polisie ondersoek ook die moontlikheid dat Kurten moontlik Dinsdagaand reeds oorlede is.
Volg Nuus24 op Twitter
- Volksblad