Sakeman brand by braai
2009-09-22 04:50
Elsje Blair
’n Gewilde sakeman van Aliwal-Noord is in ’n bedenklike toestand nadat hy vermoedelik petrol oor sy braaikole gegooi het.
Robert Swanepoel (38), wat as “’n groot braaier” beskryf word, het erg verbrand toe hy vermoedelik petrol oor die kole gegooi en die petrolhouer in sy gesig ontplof het.
Amanda Appelgryn, woordvoerder van die Bloemfontein-Medi-Clinic, het gesê Swanepoel het brandwonde aan sy gesig en bolyf en veral sy arms opgedoen. Hy het ook van die vlamme ingeasem. Hy is in die hospitaal se waakeenheid.
“Hy is aan ’n ventilator gekoppel en sy toestand is kritiek maar stabiel. Hy gaan môre weer na die teater gebring word vir verdere veloorplantings.”
Swanepoel se vrou, Mercia, wat langs sy bed waak, was gister nog baie getraumatiseerd ná die voorval.
“Robert en drie vriende het ná ’n vergadering omstreeks 23:00 by ons huis gebraai. Die vuur wou nie vlam vat nie en iemand het voorgestel dat Robert bietjie petrol op die kole moet gooi. Hy braai gereeld en hy is baie verantwoordelik as dit by sulke goed kom.”
Sy was in die huis besig om te werk en hul drie kinders het geslaap toe sy ’n oorverdowende slag buite gehoor het.
“Ek het na buite gehardloop. Dit was chaos. Robert was vol vlamme en hy het geskree: ‘Ek brand, ek brand!’ Die hond het ook gebrand en rondgehardloop. Wickus Els, ’n vriend, het Robert gegryp en hom op die grond gegooi sodat hy die vlamme met die grond kan blus.”
Die kinders het wakker geword van die gillery. Sy het hulle weer bed toe gestuur, het sy gesê.
“Robert het petrol in die petrolkan se proppie gegooi en dit glo oor die kole gegooi. Hy het die petrolkan in sy een hand vasgehou terwyl hy langs die braaier gestaan het. Ons weet nie wat toe presies verder gebeur het nie.”
Santie Terblanche, sy suster, het gesê hulle het dadelik met Swanepoel na die hospitaal in Aliwal-Noord gejaag. Hy is daarna na Bloemfontein geneem.
Haar broer is nog onder verdowing, het sy gesê.
- Beeld