Sak onderklere kelder byna Stormers-terugvlug
2011-06-20 08:55
Bloemfontein – Die Stormers se terugkeer na Kaapstad ná sy sege oor die Cheetahs is amper in die wiele gery toe ’n “bom” op die Bloemfonteinse lughawe ontdek is.
Dit het Sondag geblyk die verdagte sportsak in die lughawegebou wat deur ’n polisiehond as ’n moontlike bom uitgewys is, was toe net ’n sak vroue-onderklere.
Jean de Villiers, Springbok-senter, wat die naweek as regtervleuel vir die Stormers uitgedraf het, het gesê hulle was Sondag omstreeks 10:00 reeds op die vliegtuig toe die vlieënier aankondig die lughawe is pas ontruim.
“Toe ons dít hoor, was ons net te bly om reeds op die vliegtuig te wees, want ons het ook gehoor vlugte van Johannesburg na Kaapstad is gekanselleer weens vulkaniese as.”
Chippy Solomons, spanbestuurder, wat langs De Villiers op die vliegtuig gesit het, het gesê hulle is nie opgehou nie.
“Ons het almal ons sportsakke gehad. Dit was vir seker ’n ander soort bom daai!”
Johan Scholtz, lughawebestuurder, het gesê ’n verdagte sportsak is in die lughawegebou gekry. “Niemand het die sak opgeëis nie. Ons het die gebou ontruim en die honde-eenheid ontbied. ’n Plofstof-hond, wat tot by die sak gebring is, het dadelik gaan lê wat beteken die sak kan plofstof bevat.”
Net vroue-onderklere is in die sak gekry.
“Ons het ook aanvanklik gelag vir dié vonds, maar soos ek sê, ons vat nie kanse nie. Vir die hond om by die sak te gaan lê, het beteken daar was vermoedelik voorheen iets soos ammunisie óf ’n vuurwapen in daardie sak.”
Hy het bygevoeg hulle gaan die eienaar probeer opspoor.
Volg Nuus24 op Twitter
- Volksblad