Saak teen pa wat vrou, seun verwurg uitgestel
2011-09-07 12:17
Johannesburg – Ben Engelbrecht (51), wat daarvan beskuldig word dat hy sy vrou en seun verwurg het, se saak is wéér in die Johannesburgse landdroshof uitgestel, het Jinine Botha van Beeld getweet.
Die saak is uitgestel vir die direkteur van openbare vervolging om te beslis of Engelbrecht in hooggeregshof verhoor gaan word. Sy borgtog is verleng.
Engelbrecht word daarvan beskuldig dat hy sy vrou, Ina, en hul 22-jarige
paraplegiese seun, Kobus, by die gesin se huis in Linden vermoor het.
Hy het blykbaar sy broer gekontak kort ná die moord. Die broer het by die huis aangekom en Engelbrecht in sy motor in die garage gevind. ‘n Swembadpyp was aan die voertuig se uitlaatpyp vasgemaak en die enjin het geloop, is vroeër berig.
Die broer het hom uit die motor getrek. Paramedici op die toneel het hom later medies gesond verklaar.
– Volg Nuus24 op Twitter