Saak teen vermeende baba-klapper heropen
2011-03-08 09:00
Pretoria – Die saak waarin ’n dagmoeder van Teddy Winks-kleuterskool in Suiderberg, Pretoria-Wes, daarvan verdink word dat sy ’n baba aangerand het, is heropen en na die direkteur van openbare vervolging (DOV) gestuur vir beslissing.
Beeld het verlede week berig dat mev. Linda Mans, die dagmoeder, nie meer vervolg gaan word op aanklag van aanranding op Keylaene-Maré Schreiber (10 maande) nie.
Die polisie het toe aan Daryl Schreiber (27), Keylaene-Maré se pa, gesê daar is te min bewyse teen Mans en dat die DOV besluit het om die klag teen haar te laat vaar nadat sy ontken het sy het die baba geslaan.
Kapt. Bongi Msimango, polisiewoordvoerder, het egter Maandag gesê die aanklag teen Mans is nie laat vaar nie. “Die dossier was by die openbare vervolger en is nou vir beslissing na die DOV gestuur,” het Msimango gesê.
Schreiber het dié verwikkeling verwelkom.
Die klag teen Mans is ingedien omdat sy Keylaene-Maré na bewering “herhaaldelik en hard” op die boude, bene, rug en arm geslaan het.
Mans het ná die voorval aan Schreiber en sy vrou, Bernadine (30), gesê ’n vrou in haar diens het hul dogter “gepiets omdat sy nie wou slaap nie”. Mans het gesê tydens die voorval het sy haar ma hospitaal toe geneem.
Die baba was skaars ’n week by die dagmoeder toe die voorval op 10 Januarie gebeur het.
Schreiber het gesê die dagmoeder het haar naam net as Chantelle aan die polisie gegee en ’n selfoonnommer wat glad nie werk nie.
Msimango het gesê die DOV het ook nog nie besluit oor die klag van aanranding op Divan Myburgh (10 maande) nie.
Mans het hom glo so hard op die regterwang geklap dat haar vingermerke vyf dae ná die klap nog sigbaar was.
Intussen het dit aan die lig gekom dat Mans nie ’n geregistreerde dagmoeder is nie en dat sy nie haar lidmaatskap by die Pretoriase Dagmoedervereniging hernieu het nie nadat dit op 31 Desember 2010 verval het.
Volg Nuus24 op Twitter
- Beeld