Saak teen 'boelie-moordenaar' uitgestel

2012-11-22 15:45

Johannesburg – 'n Gr.11-leerder van die Oosrand het Donderdag in die Boksburg-landdroshof verskyn nadat hy glo 'n medeleerder doodgeskiet het.

Phindile Louw, woordvoerder van die nasionale vervolgingsgesag, het gesê die saak is tot 29 November uitgestel vir 'n formele borgtogaansoek.

Die 18-jarige Phineas Xulu is Dinsdag in hegtenis geneem.

Hy het na bewering sy ma se dienspistool gebruik om Nkululeko Ndlovu, 'n gr.10-leerder, dood te skiet toe hy en sy vriende hom in 'n klaskamer konfronteer het.

The Star het Donderdag berig dat niemand bereid was om 'n traan te stort oor die boelie nie, en dat die algemene gevoel was dat hy gekry het wat hy verdien het.

"Ons is nou verlig dat hy dood is. Ons sal ons kos eet en ons geld spandeer," het 'n leerder aan die koerant gesê.

Ndlovu se familie het egter ontken dat hy 'n probleemkind was en het gesê hulle was nie bewus daarvan dat hy 'n boelie is nie.
      
– Volg Nuus24 op Twitter

- SAPA