SOE-hoof glo óók ondersoek
2011-07-11 12:16
Johannesburg – Die hoof van die Spesiale Ondersoekeenheid (SOE), Willie Hofmeyr, is die jongste misdaadvegter wat deur die polisie ondersoek word, het The Star Maandag berig.
Die SOE is ’n onafhanklike agentskap wat korrupsie en wanbestuur in die staatsdiens ondersoek.
Hofmeyr word ondersoek oor verskaffingskwessies wat verband hou met die SOE nadat Veronica Marshsmit, voormalige hoof- finansiële beampte, geskors is en later bedank het.
Hofmeyr het Sondag bevestig dat hy ondersoek word.
Op die vraag hoekom hy ondersoek word, het Hofmeyr gesê: "Daar word verwag dat daar pogings sal wees om diegene wat ernstige korrupsie hanteer, te diskrediteer en dit het in die verlede gebeur. 'n Mens moet net sterk genoeg wees om dit te hanteer wanneer dit gebeur."
"Terselfdertyd is ons almal gelyk voor die wet en ek kan nie spesiale behandeling verwag nie, maar ek verwag om regverdig behandel te word."
Die nasionale vervolgingsgesag wou nie Sondagaand kommentaar lewer nie.
Die SOE is betrokke in talle ondersoeke, waaronder 'n ondersoek na verskaffingsprosedures in die polisie.
Hofmeyr het in Maart aan LP's gesê die SOE ondersoek 16 departemente en openbare entiteite vir bedrog en wanadministrasie.
Nuus van dié ondersoek kom dae ná bewerings van korrupsie en bedrog teen die Openbare Beskermer, adv. Thuli Madonsela.
– Volg Nuus24 op Twitter
- SAPA