SMS-taal 'laat leerders nie verkeerd spel nie'
2010-10-11 09:22
Die Burger
Kaapstad - Selfone, SMS’e en MXit is nié die rede waarom kinders nie kan spel nie.
Dít het onlangs aan die lig gekom in ’n studie van Kristy Winzker, ’n nagraadse student in filosofie aan die Universiteit Stellenbosch.
Die studie is onder 88 leerders van ’n Engels-Afrikaanse dubbelmediumskool in ’n middelklas-gemeenskap in die Wes-Kaap gedoen.
Die studie, getiteld “Investigating the impact of SMS speak on the written work of English first language and English second language high school learners”, het gefokus op die effek van SMS-taal op kinders se geskrewe werk.
Daar is spesifiek gekyk na spelfoute, gebrek aan of oorgebruik van leestekens, verkorting en weglating van woorde en die gebruik van emotikone.
Die studie toon dat leerders wel baie van SMS’e en MXit-tegnologie gebruik maak, maar dat die voorbeelde van verkeerde taalgebruik as gevolg hiervan nie buitensporig nie.
Kinders het die vermoë om tussen die taalregisters te onderskei en kan die korrekte vorm van geskrewe werk lewer wanneer dit van hulle verwag word, het sy bevind.
Volgens Winzker is dit die onderwyser se verantwoordelikheid om kinders toe te rus met taalkennis en ’n sin van verantwoordelikheid om taal korrek te gebruik.
“Die onderwyser en die taalbeleid by die skool speel ’n bepalende rol in leerders se korrekte taalgebruik.”
Volgens dr. Kate Huddelstone van die departement algemene taalwetenskap van die US kan die bevindings van dié studie nie noodwendig deurgetrek word na Afrikaans nie.
“Daar is baie minder letter- en nommer-woorde in Afrikaans wat dieselfde klink.”
- Die Burger