SA'ner in Mosambiek-tronk oor hotelrekening

2012-11-10 15:00

Johannesburg – 'n Suid-Afrikaanse man is  die afgelope drie maande in 'n tronk in Mosambiek omdat hy nie sy hotelrekening kon betaal nie, het Beeld  Saterdag berig.

'n Woordvoerder vir internasionale betrekkinge, Nelson Kgwete, het aan die koerant gesê dat sy departement nie die 40-jarige Albert Smith kan help nie, omdat die uitstaande rekening persoonlike skuld is.

"Die Suid-Afrikaanse Hoë Kommissie in Maputo kan nie betrokke raak nie, want dit is 'n saak tussen Smith en sy krediteure."

Smith kan slegs vrygelaat word sodra sy rekening van R5 300 by die Fatima-hotel en Gastehuis in Inhambane vereffen word en 'n deportasietarief van R600 betaal word.

Hy is nie deur die polisie van enige misdaad aangekla nie.

Smith se suster, Elize, het gesê sy familie sukkel om uit te vind wat presies gebeur het en hoe om hom terug te kry in Suid-Afrika.

Hulle weet ook nie hoe om vir die rekening te betaal en of dit in Mosambiek gedoen moet word nie.

Volg Nuus24 op Twitter.

- SAPA