SAID wil Malema laat sekwestreer

2013-01-31 08:51

Johannesburg – Julius Malema, voormalige leier van die ANC-jeugliga, gaan al sy bates verloor, berig City Press.

Die koerant het bevestig dat die Suid-Afrikaanse Inkomstediens (SAID) Woensdag by die Noord-Gautengse hooggeregshof aansoek gedoen het dat Malema gesekwestreer word.

Malema skuld die SAID R16 miljoen en is “feitelik insolvent en in geen posisie om sy skuld aan die SAID te betaal nie,” het hofdokumente gelui.

Malema sal Donderdag met sy prokureurs vergader om te besluit of hy die aansoek sal teenstaan.

Indien die aansoek suksesvol is of nie teengestaan word nie, sal al Malema se eiendomme onder kuratorskap geplaas en opgeveil word om sy skuld af te betaal.

Dit sluit in sy huise in Sandton en Polokwane, ‘n kleinhoewe en ‘n plaas buite die hoofstad van Limpopo.

Die verhoor is vir 27 Februarie geskeduleer.

– Lees meer hier.

– Volg Nuus24 op Twitter

- SAPA