SABC skrap onderhoud met Zapiro
2012-12-13 11:21
Johannesburg – Die SABC het ‘n televisieonderhoud met die spotprentkunstenaar Jonathan Shapiro – beter bekend as Zapiro – gekanselleer, het The Times berig.
Zapiro sê die insetsel, wat reeds opgeneem is, is as gevolg van “opdragte van bo” nie uitgesaai nie.
“Selfs in die onderhoud het dit gevoel asof ek genoop word om iets positief oor die president te sê,” het hy aan die koerant gesê.
Kaizer Kganyago, woordvoerder van die openbare uitsaaier, het aan die koerant gesê hy weet nie wat die redes agter die besluit is om die onderhoud op Interface te kanselleer nie.
Zuma het onlangs ‘n eis van skadevergoeding teen die spotprentkunstenaar teruggetrek. Die saak het verband gehou met die spotprent Raping justice.
Talle ander politieke programme is ook onlangs deur die openbare uitsaaier gekanselleer.
‘n Radio-geselsprogram waarin drie joernaliste die ANC se komende verkiesingkongres sou bespreek, is verlede week ook laat vaar.
Die SABC het sy stappe verdedig en gesê afgevaardigdes van die party moes ook teenwoordig wees, om te verseker dat die program gebalanseerd sou wees.
The Times het vroeër die week berig oor ‘n brief wat na bewering deur verslaggewers, vervaardigers en aanbieders van die SABC geskryf is. In dié anonieme brief word die uitsaaier van politieke inmenging beskuldig.
Die brief het byvoorbeeld klagtes bevat dat joernaliste berispe word indien hulle nie genoeg dekking aan die president gee nie.
Volg Nuus24 op Twitter
- SAPA
