SABC sê nee vir Zuma-advertensie
2012-11-27 09:15
Johannesburg – Die SABC het 'n vis-en-tjips-advertensie verbied wat uitbeeld hoe pres. Jacob Zuma en sy groot gesin aandete geniet.
Die advertensie sou vanaf Maandagaand uitgesaai word, maar is twee uur voor dit op televisie sou verskyn, gekanselleer, het The Star berig.
Die advertensie begin met die woorde "Dinner time at Nkandla" wat oor 'n foto van die huis verskyn.
In die volgende greep sit 'n vrou aan die einde van 'n lang tafel, met kinders en verskeie ander vroue aan albei kante. Sy sê dan in Zoeloe: "O Zuzulicious, ons eet vis en tjips van Shabba vandag".
Die groot familie geniet dan die vis-en-tjips-ete.
'n Geanimeerde Zuma reageer: "Eet liefie, daar is baie goeie kos hier. Dit is van die Fish and Chip Company. Daar is baie van julle in die huis en teen slegs R25, sal selfs Pravin dit goedkeur".
Paul Warner, kreatiewe direkteur by MetropolitanRepublic Group, die agentskap wat die advertensie vervaardig het, het gesê daar is aan hulle gesê die advertensie is verbied, omdat dit "neerhalend is teenoor die president".
"Hulle het gesê ons SABC-base het die besluit gemaak om nie die advertensie uit te saai nie."
Warner het aan die koerant gesê daar is niks fout met die advertensie nie en hy verstaan nie hoe dit gekanselleer kan word op grond daarvan dat dit neerhalend is sonder dat iemand daaroor gekla het nie.
Carlo Gonzaga, uitvoerende hoof van Taste Holding, waaronder die maatskappy val, het gesê dit is "verstommend dat die SABC so 'n eensydige besluit namens die publiek sal neem.
Kaizer Kganyago, woordvoerder van die SABC, het gesê hy is nie bewus van die advertensie nie en ook nie dat amptelike instruksies uitgereik is om nie die advertensie uit te saai nie.
Kyk hier na die advertensie:
– Volg Nuus24 op Twitter
- SAPA
