SABC ontken aantygings oor Mandela-begrafnis
2011-07-21 18:24
Johannesburg – ‘n Ondersoek deur die SABC kon geen bewyse vind wat ‘n nuusberig sou staaf dat dié uitsaaier R3 miljoen aan Hoofman Mandla Mandela betaal het vir die regte tot Nelson Mandela se begrafnis nie.
“Die SABC het alle moontlike kanale uitgeput om uit te vind waar so ‘n kontrak sou wees, en daar is bevind dat geen só ‘n kontrak bestaan nie,” het Kaizer Kganyago, woordvoerder, Donderdag gesê in ‘n gesamentlike verklaring deur die SABC en Hoofman Mandela.
Luidens ‘n berig in die Sunday World-koerant van 31 Mei 2009 het die SABC R3 miljoen aan Mandla Mandela betaal vir die eksklusiewe regte tot sy oupa se begrafnis.
Volgens Kganyago het die SABC die kwessie reeds in ‘n verklaring in 2009 opgeklaar, maar “sommige gedeeltes van die media-gemeenskap verwys steeds na dié aantygings as feite.
“Gevolglik het ‘n persepsie voortbestaan wat gelei het tot die skaad van Hoofman Mandela se beeld,” het Kganyago gesê.
“Die SABC en Hoofman Mandela het dit nodig geag om die kwessie weer aan te raak en die boodskap aan die publiek oor te dra sodat die kwessie vir eens en vir altyd tot ruste kan kom.”
Hoofman Mandela het ‘n beroep op “alle media-praktisyne” gedoen om “die nagevolge van die verspreiding van valse inligting te oorweeg”.
Hy het in die verklaring gesê: “Ek hoor vandag nog mense hieroor praat en hoe hulle hierdie leuens gebruik om te bepaal watter soort persoon ek is. Ek is bly ons kan hierdie kwessie nou tot ruste laat kom.”
- Volg Nuus24 op Twitter
- SAPA