'SABC het nie Mbeki-dokkie geweier'
2009-11-17 16:25
Johannesburg - Die SABC het nie geweier om 'n omstrede dokumentêre program oor die Thabo Mbeki-era en MIV-sterftes uit te saai nie, sê die nuusagentskap Health-e.
"Hulle het nooit geweier om dit uit te saai nie," het Kerry Cullinan, besturende redakteur van Health-e, gesê.
"Die SABC het 'n ruk geneem om te besluit of hulle dit wou hê. Hulle het nooit gesê hoekom nie."
Beeld het Dinsdag berig dat dié program aanvanklik vir die SABC se Special Assignment gemaak is, maar die korporasie het glo bevind dat die aantygings teen Mbeki te omstrede en selfs ongegrond is.
The Price of Denial kyk na die prys wat Suid-Afrika steeds betaal weens Mbeki se ontkenningsbeleid oor MIV/vigs.
Dit toon onder meer aan hoe duisende babas onnodig met die virus besmet is, al het farmaseutiese maatskappye nevirapien gratis aan die staat gebied.
Die program vertel ook die verhaal van verkragte kinders wat weens regeringsopdrag nie antiretrovirale medisyne by die staat kon kry nie
Dit stel die vraag of daar enige manier is waarop die regering nou kan vergoed vir die skade wat gewone mense steeds ly.
Die program is aanvanklik deur Health-e News Service vir die SABC vervaardig. Dit haal onder meer ’n studie van die Harvard-universiteit aan dat meer as 330 000 Suid-Afrikaners onnodig dood is in die jare van Mbeki se ontkenningsbeleid.
Nuushoofde by die SABC het twee maande lank gewik en geweeg of hulle dié dokumentêr gaan uitsaai. Health-e News Service het die program aan die SABC onttrek en dit aan e.tv aangebied.
Beeld verneem dat die SABC “besorg” was oor van die aantygings en gevoel het dat dit selfs onregverdig was.
Mbeki het geweier om aan die program deel te neem of kommentaar te lewer.
Volgens die program is meer as 70 000 kinders in die beginjare van die Mbeki-era elke jaar met MIV gebore. Die regering kon nevirapien verniet kry, maar Mbeki het geweier omdat dit glo giftig sou wees.
Selfs nadat die kabinet ’n landwye bekendstelling van antiretrovirale medisyne goedgekeur het, het dr. Manto Tshabalala-Msimang, Mbeki se minister van gesondheid, voete gesleep met die inwerkingstelling van die beleid en volgehou met die bevordering van ’n omstrede dieet van onder meer knoffel, olyfolie en beet.
Die uitvoerende regisseur van 3rd Degree, Debora Patta, sê The Price of Denial lug belangrike vrae rondom ’n dekade van ontkenning en kwaksalwery.
Kaizer Kganyago, woordvoerder van die SABC, weier om kommentaar te lewer voor hy meer inligting oor dié saak het.
Buti Manamela, leier van die Young Communist League, het gesê Mbeki en Tshabalala-Msimang moet aangekla word van volksmoord.
In reaksie op dié stelling, het Julius Malema, leier van die ANC-jeugliga, gesê die ANCYL sal nie toelaat dat Mbeki aangekla word nie.
"Thabo Mbeki het dalk foute gemaak, maar ons kan hom nie aankla nie. Ons moenie een van ons eie (mense) aankla nie," het Malema Maandag gesê.
– Sapa