SAA-vlugte gekanselleer oor sneeustorm in VSA

2013-02-09 10:15

Johannesburg – Twee SAA-vlugte tussen Johannesburg en New York is weens 'n sneeustorm in die Verenigde State gekanselleer, het die lugredery Vrydag gesê.

Die vlugte is SA203 wat Vrydag vanaf Johannesburg na New York sou vertrek en SA204 wat Saterdag vanaf New York na Johannesburg sou vlieg.

Ander vlugte na en vanaf New York sal soos geskeduleer voortgaan, tensy die weer in New York verander.

Die lugredery het om verskoning gevra, maar gesê die veiligheid van passasiers is 'n nie-onderhandelbare prioriteit.

"Ons sal steeds die situasie in New York en Washington monitor en enige nuwe verwikkelinge oor die storm sal deurgegee word."

Die nuusagentskap AP het Vrydag berig dat 'n erge sneeustorm die noordooste van die Verenigde State kan tref. Sommige skole in die gebied is gesluit en plaaslike lugrederye het duisende vlugte gekanselleer.

Waarskuwings van 'n sneeustorm is vir dele van New Jersey en New York se Long Island uitgereik, sowel as dele van die Nieu-Engeland-streek, insluitend Massachusetts, Rhode Island en Connecticut. Die waarskuwings strek tot in New Hampshire en Maine.
       
– Volg Nuus24 op Twitter

- SAPA