SAA lig verbod op wit kadette

2012-08-19 11:22

 Johannesburg – Die Suid-Afrikaanse lugdiens (SAA) het sy verbod op wit mans se aansoeke vir die kadetprogram vir voornemende vlieëniers opgehef, het die Sondagkoerant Rapport berig.

Die lugdiens se webtuiste is verander dat wit kandidate se aansoeke nie outomaties verwerp word nie, het Fikile Thabethe, hoof van SAA se regsdepartement, gesê.

Die verbod is Vrydag gelig nadat die vakbond Solidariteit 'n brief van sy prokureurs aan SAA gestuur het om te vra dat die kwotastelsel vir voornemende vlieëniers laat vaar word.
 
Die DA en Solidariteit het Vrydag woedend gereageer oor die nuus dat wit kandidate uitgesluit sal word by die SAA se kadetprogram.

'n Woordvoerder vir die lugdiens, Kabelo Ledwaba, het aan Beeld gesê die inisiatief was om vlieëniers se demografie in pas met dié van die land te bring.

"Slegs 15% van SAA se vlieëniers is tans swart – wat bruines en Indiërs insluit. Die res is wit. Boonop is 91% van hulle mans."

Die sluitingsdatum vir die kadetprogram se aansoeke is ook vanaf 17 Augustus na 31 Augustus verleng, nadat Solidariteit daarop aangedring het.

Volg Nuus24 op Twitter.

- SAPA