SAA 'diskrimineer,' meen EU-parlementslid

2012-08-25 08:02

’n Lid van die Europese Unie-parlement het 'n voorstel ingedien dat landingsregte van die Suid-Afrikaanse Lugdiens (SAA) gekanselleer word, berig RSG.

Lucas Hartong se voorstel volg nadat die SAA bevestig het dat sy werwingsprogram vir nuwe vlieëniers deur die Wet op Gelyke Indiensneming gedryf word.

Die lugredery is die afgelope week in die spervuur oor bewerings dat wit kandidate nie aansoek kon doen vir indiensneming as vlieëniers nie.

Hartong, 'n lid van Nederland se Vryheidsparty, het vrae ingedien waarin hy vra of die SAA se beleid in ooreenstemming is met die EU se stryd teen diskriminasie. Hy sê diskriminasie op grond van kleur of herkoms is verkeerd.

Die woordvoerder van die SAL, Tladi Tladi, het ontken dat die SAA in sy indiensnemingsbeleid diskriminerend is. Hy sê die doel van die program is om vaardighede te ontwikkel.

Die lugdiens se webtuiste is verlede week verander dat wit kandidate se aansoeke nie outomaties verwerp word nie, het Fikile Thabethe, hoof van SAA se regsdepartement, aan Rapport gesê.

Volg Nuus24 op Twitter.