SA word welsynstaat – verslag
2011-02-01 07:45
Pretoria – Suid-Afrika ontaard in ’n welsynstaat met sowat 14 miljoen mense wat maandeliks maatskaplike toelaes van die regering ontvang.
So het die Suid-Afrikaanse Instituut vir Rasseverhoudinge (SAIRV) in ’n verklaring gesê. Volgens die SAIRV het die getal mense wat toelaes ontvang die afgelope nege jaar met meer as 300% toegeneem.
In die 2009-’10-boekjaar was daar byna 14 miljoen begunstigdes in Suid-Afrika.
Die meeste van dié begunstigdes (9 miljoen) was kinders en die tweede meeste (meer as 2 miljoen) bejaardes.
“Maatskaplike toelaes loop die gevaar om ’n afhanklikheidsindroom te laat ontwikkel,” het Nachi Majoe, ’n lid van die instituut se navorsingspan, gesê.
Luidens die SAIRV-verklaring raam die departement van finansies dat 16 miljoen mense teen 2011-’12 maatskaplike toelaes gaan ontvang.
“Hiervan sal meer as 10 miljoen toelaes aan kinders wees. Maatskaplike toelaes is ’n buffer teen armoede vir miljoene arm Suid-Afrikaners en 30% van die 49,9 miljoen mense in die land ontvang tans toelaes van die staat.”
In 2009 het 28% van die bevolking die een of ander toelae ontvang.
Vroue het sowat 53% van die begunstigdes uitgemaak en swart mense 89%. Die meeste van hulle is in KwaZulu-Natal.
Volg Nuus24 op Twitter
- Beeld