SA skenk R90 miljoen aan Mali

2013-01-29 17:04

Johannesburg – Suid-Afrika het meer as R90 miljoen geskenk om geweld in Mali te bekamp, het Nosiviwe Mapisa-Nqakula, minister van verdediging, Dinsdag gesê.

"Namens president Jacob Zuma, skenk die Republiek van Suid-Afrika $10 miljoen (meer as R90 miljoen) aan die Mali-fonds vir die versterking van polisiemagtem," het sy op 'n skenkerskonferensie in Addis Ababa, Ethiopië, gesê.

"Suid-Afrika voeg sy stem by dié van ons mede- Afrika-broers en -susters en die internasionale rolspelers om die geweld teen die mense van Mali te veroordeel."

Mapisa-Nqakula het gesê Suid-Afrika het ook noodleniging ter waarde van R122 miljoen aan die land gestuur.

Dít is behalwe die $55 miljoen (sowat R499 miljoen) wat die Afrika-unie geskenk het.

Die nuwe magte gaan probeer om die weermag in Mali teen Al-Kaïda-geaffilieerde groepe te ondersteun. Dié groepe het beheer geneem oor die noorde van die land.

Op 11 Januarie het Franse gewapende magte tot die konflik toegetree.
      
– Volg Nuus24 op Twitter

- SAPA