'SA se vakansiedae diskrimineer teen ander gelowe'

2012-06-21 11:55

Johannesburg – Die Islamitiese Intergeloofs-navorsingsinstituut het gevra dat twee van Suid-Afrika se bestaande vakansiedae omgeskakel word in vakansiedae vir Eid en Diwali.

Rafeeq Hassan, direkteur van die instituut, het dié beroep gedoen voor die aanvang van vandag se openbare sittings in Durban.

Hassan sê dit is nie regverdig dat Moslems en Hindoes verlof moet neem om hul godsdienstige vakansiedae te vier nie, het RSG berig.

Die Kommissie vir die Bevordering en Beskerming van Gemeenskappe se Kulturele-, Godsdienstige- en Taalregte het die sittings gereël.

Openbare vergaderings sal later in Gauteng, die Wes-Kaap en die Vrystaat oor dié kwessie gehou word.

Beeld het vroeër berig die kommissie het ‘n aantal “klagte en versoeke” ontvang dat Suid-Afrika se openbare vakansiedae net Christenskap erken en onregverdig teen ander gelowe diskrimineer.

Die doel van die vergaderings is om openbare deelname aan te moedig. Inligting sal ook van gemeenskappe ingesamel word om te bepaal of diskriminasie plaasvind of nie.

Mense wat voorleggings wil doen, kan die kommissie by 011 537 7600 bel. Besoek ook www.crlcommission.org.za vir meer inligting.

– Wat dink jy van Suid-Afrika se huidige openbare vakansiedae? Gee dié dae genoeg erkenning aan ander gelowe? Stuur vir ons ‘n e-pos na [e-mail]

Volg Nuus24 op Twitter