SA se rykste man R22,99 miljard sterk
2011-09-05 09:14
Johannesburg – Die mynmagnaat Patrice Motsepe beklee die topplek op Sunday Times se lys van Suid-Afrika se rykstes.
Motsepe, voorsitter van African Rainbow Minerals, is nagenoeg R22,99 miljard werd.
Die Indiese staalmagnaat Lakshmi Mittal, wat die afgelope paar jaar bo-aan die lys was, is nou tweede met R20,87 miljard.
Sharon Wapnick, nie-uitvoerende direkteur van Octodec Investments, is die enigste vrou op die lys van die 100 rykstes. Van die ander name wat op die lys verskyn, is die van Whitey Basson, uitvoerende hoof van Shoprite; Chris Wells, voormalige waarnemende uitvoerende hoof van Transnet; Marius Kloppers, uitvoerende hoof van die myngroep BHP Billiton; Bernard Kantor, besturende direkteur van Investec; en Nicky Oppenheimer.
Dié lys is saamgestel deur Who Owns Whom, ’n onafhanklike navorsingsmaatskappy wat op die Suid-Afrikaanse sakewêreld en ekonomie fokus.
Navorsers het ’n ontleding gedoen van die eiendom van die direkteure van alle maatskappye wat op die Johannesburgse effektebeurs genoteer is. Dit is gegrond op inligting wat vrylik vir die publiek beskikbaar is.
Luidens die verslag is daar 28 miljardêrs in Suid-Afrika in vergelyking met 31 verlede jaar. – Sapa
Volg Nuus24 op Twitter.
- Volksblad