SA se Olimpiese bod in die pyplyn
2010-07-12 14:32
Johannesburg - Gideon Sam, voorsitter van die Suid-Afrikaanse Sportkonfederasie en Olimpiese Komitee (Saskok), het Maandag bevestig dat Suid-Afrika dit oorweeg om ‘n bod in te sit vir die Olimpiese Spele in 2020 of 2024.
Dít kom slegs ‘n dag nadat die eerste Wêreldbeker-sokkertoernooi suksesvol in Afrika aangebied is. Volgens Sam sal Saskok met die Suid-Afrikaanse regering in besprekings tree oor die moontlikheid dat Suid-Afrika die Spele kan aanbied.
“Dit is ‘n droom van die Internasionale Olimpiese Komitee (IOK) om ontwikkelende lande die kans te gun om die Spele aan te bied,” het Sam gesê.
“Dit is nou in die hande van die regering, die Nasionale Olimpiese Komitee en die sport-gemeenskap om te besluit of Suid-Afrika die Spele sal kan aanbied.”
Jacques Rogge, president van die IOK, het Suid-Afrika geprys vir sy “uitstaande sukses” met die aanbieding van die Wêreldbeker-sokkertoernooi.
“Ons het van die begin geweet dat Suid-Afrika dit sal kan doen,” het Rogge gesê.
Die adjunk-minister van sport, Gert Oosthuizen, het bevestig dat Suid-Afrika daarin sou belangstel om die Olimpiese Spele in 2020 of 2024 aan te bied.
Volg Nuus24 op Twitter.
- SAPA