‘SA sal binne 5 jaar brand’
2012-04-07 11:00
Durban – “Suid-Afrika sal binne vyf jaar brand en sy eie Arabiese Lente hê met miljoene jong mense wat oor werkloosheid en swak onderrig in opstand kom”.
Só het Eugene Daniels, direkteur van die Metro-Suid-onderwysdistrik in die Wes-Kaap, vandeesweek hier op ’n kongres oor basiese onderwys gesê.
Volgens Daniels word die land deur skrikwekkende gevolge in die gesig gestaar met meer as vier miljoen jong mense wat werkloos is en geen vooruitsigte het nie.
“Die jeug is kwaad en onderwys is tussen politiek en burokrasie vasgevang. Daar gaan niks van hierdie land oorbly as ons soos nou aangaan nie. En die opstande van 1976 sal soos ’n piekniek lyk.”
Daniels meen dis belaglik om elke jaar ’n ophef van die matriekslaagsyfer te maak terwyl derduisende leerders uit die skoolstelsel val en nie eens tot matriek vorder nie. Duisende wat wel deurkom, het egter ook geen vooruitsigte of geleenthede nie.
“Ons is middelmatig. Ons lei niemand om die bos nie en die kinders weet ook ons maak geen verskil nie.”
Hy het verwys na net een uit agt jeugdiges jonger as 25 wat ’n werk het, waarvan 40% in die opkomende ekonomie is.
Daniels het gesê vandag se leerders is baie anders en tog probeer die onderwysstelsel om die toekoms te bereik op dieselfde manier as hoe dinge in die verlede gedoen is.
Daniels meen die onderwysstelsel moet heeltemal hervorm word en om dit te bereik, mag dit nodig wees om onderwysers ’n hele jaar uit die stelsel te haal en “alles tot stilstand te bring”.
Hy het gesê beroepsgerigte opleiding en vakmanskap moet dringend reggeruk en bevorder word. “In Switserland skryf 70% van gr.10-leerders vir vakleerlingskappe in. Hier wil almal universiteit toe gaan. Ons stuur op ’n ramp af.”
Dr. Nick Taylor, senior navorsingsgenoot by JET Education Services, ’n nieregeringsorganisasie, het na skoolverandering verwys en gesê dit lyk of die regering nou meer op verantwoordbaarheid begin klem lê. “Maar die mate waartoe onderwysers op verantwoordbaarheid kan reageer, is afhanklik van hul kapasiteit.”
Taylor het gesê baie kan gedoen word om skoolleierskap, bestuur en klaskamerkwessies te verbeter, maar uiteindelik gaan alles oor kennisoordrag of die verwerwing daarvan.
Hy het na die projek van die Suider- en Oos-Afrika-konsortium vir die monitering van onderwysgehalte (Sacmeq) verwys waar onderwysers en leerders oor dieselfde items getoets is.
Dit het aan die lig gekom Suid-Afrikaanse onderwysers vaar nie swak met elementêre kennis nie, maar hulle sukkel baie met moeiliker begrippe en kan dit glad nie oordra nie.
“As onderwysers se kennis van hul vakke nie dramaties verbeter nie, sal ons aanhou om net laeplafon-verbeterings te sien,” het dr. Taylor gesê.
Volg Nuus24 op Twitter.
- Die Burger
