SA polisie ondersoek nog Campbell-diamante
2010-08-07 14:14
Johannesburg - Die ondersoek na die ongeslypte diamante wat ‘n trustee van die Nelson Mandela Kinderfonds by die supermodel Naomi Campbell gekry het, duur voort.
“Ons het nog nie enige nuwe leidrade in die ondersoek om te bepaal wat die storie met hierdie diamante is nie,” het die Valke se woordvoerder, Musa Zondi, Saterdag gesê.
Zondi het Vrydag aangedui die polisie sal met baie mense onderhoude moet voer - selfs met Campbell, indien dit nodig geag word.
Die “klippies” se egtheid is onlangs deur die Diamantraad getoets en daar is bevind dat dit wél diamante is, maar die waarde daarvan is nog nie vasgestel nie.
Zondi het gesê dit sal nie maklik wees om vas te stel of dit sogenaamde “bloeddiamante” is nie, “maar daar is maniere om dit te takel.”
“Bloeddiamante” is diamante wat gebruik is om burgeroorloë te befonds.
Volgens Zondi kan ‘n persoon in Suid-Afrika wat met ongeslypte diamante betrap word tot 10 jaar tronkstraf uitdien, ‘n R250 000-boete opgelê word, of albei.
Zondi het bevestig ‘n trustee van die Nelson Mandela Kinderfonds het die diamante aan hulle oorhandig en gesê hy het dit van Campbell ontvang.
Jeremy Ratcliffe het gesê hy het die diamante Donderdag aan die polisie oorhandig. Campbell het Donderdag in Den Haag in die verhoor van die voormalige Liberiese leier Charles Taylor getuig dat sy “vuil klippies” van hom (Taylor) ontvang het ná ‘n ete in Suid-Afrika in 1997 waarvan einste oudpres. Nelson Mandela die gasheer was.
Ratcliffe sê Campbell het die “klippies” in 1997 op die Bloutrein aan hom gegee. Hy was tot Donderdag in besit daarvan.
- SAPA