SA op pad na ‘volbloed roofstaat’
2010-08-27 06:37
Kaapstad – Zwelinzima Vavi, hoofsekretaris van die vakverbond Cosatu, het gister kaalvuis ingeklim onder Suid-Afrika se “korrupte politieke elite” en gesê hulle is besig om die land in ’n “volbloed-roofdierstaat” te omskep.
Hy het die “skandalige” Arcelor Mittal-transaksie uitgesonder waardeur vriende en familielede van pres. Jacob Zuma op omstrede wyse miljoene rande se aandele in die waardevolle Sishen-myn gekry het.
“Ons stuur af op ’n roofdierstaat waar ’n magtige, korrupte en demagogiese elite van politieke hiënas die staat toenemend gebruik om ryk te word,” het Vavi gesê.
Nes die “hiëna en haar dogters” in die natuur “eerste vreet”, só “vreet die staatshoof se familie eerste” in dié roofdierstaat.
“Ons móét nou keer dat Suid-Afrika ’n staat word waar korrupsie die norm is en geen besigheid met die regering gedoen kan word sonder om eers ’n korrupte hekwagter te betaal nie,” het Vavi op ’n nuuskonferensie by Cosatu-huis in Johannesburg gesê.
Cosatu se senior leiers het strydlustig uitgevaar teen ’n spandabelrige regering en bevoorregte ministers wat vir staatsdienswerkers oor beperkte fondse predik.
Vavi het die regering ingevlieg oor uitgawes op Wêreldbeker-sokkerkaartjies en gemaan hulle “onderskat” werkers se woede. Ministers wat in luukse Duitse motors rondry en wie se kinders in private skole is, moet ook liefs stilbly.
“Daardie groen boek (ministeriële handboek) wat ministers die reg gee om in die Mount Nelson-hotel te bly – die werkers weet hiervan en hulle is kwaad.”
Volgens S’dumo Dlamini, Cosatu-president, moet die regering, en nie vakbonde nie, verantwoordelikheid aanvaar vir siek babas en pasiënte wat weens die staatsdiensstaking in staatshospitale dood is.
Cosatu is onverbiddelik daaroor dat staatsdienswerkers nie sal bes gee nie totdat die regering aan hul verhoogde salaris-eise voldoen. Voorts sal al die vakbonde wat by Cosatu geaffilieer is volgende Woensdag aan ’n sekondêre staking deelneem uit simpatie met staatsdienswerkers se nood.
Oor die ANC-alliansie het Vavi gesê die wittebrood ná die Polokwane-konferensie is verby. Cosatu is teleurgesteld oor onvervulde beloftes vir ’n nuwe nywerheidsbeleid en ’n ekonomiese groeiplan.
Pleks dat die ANC fokus op disfunksionele skole en die “katastrofiese” 1,1?miljoen werksverliese sedert 2009, “bemoei hy hom eerder met leierskapkwessies”.
Die vakverbond het nie begrip vir die ANC se haas met ’n onafhanklike mediatribunaal terwyl daar brandende kwessies soos werkloosheid en armoede is nie.
Hoewel Cosatu gekant is teen selfregulering in die gedrukte media, “kan ons nie ons blindelingse steun gee aan iets wat korruptes wegkruipplek sal gee nie”, het Dlamini gesê.
Volgens Vavi sal die ANC eers moet navorsing doen oor die regte model vir regulering. “Wat beteken ‘onafhanklik’? In die Suid-Afrikaanse konteks beteken dit dr. Ben Ngubane (SAUK-raadsvoorsitter), en dít maak ons bang.”
Cosatu waarsku gieriges probeer die ANC oorneem en dat dit dienslewering verlam. Dit is so erg dat kiesers teen volgende jaar se plaaslike verkiesings hulle by opposisiepartye kan skaar.
“Dit gaan ’n uitdaging wees om kiesers in sommige arm gemeenskappe te oortuig om by die ANC te bly,” lui hul verklaring.
Cosatu het ook daarteen besluit om alle ANC-kandidate in volgende jaar se verkiesings goedsmoeds te steun. “Ons weier om veldtogte te voer vir ’n dief of onbevoegde, lui mense wat hulself net vir eie gewin beskikbaar stel.”
Volg Nuus24 op Twitter.
- Die Burger