SA moet stem oor e-tolstelsel – kenner

2013-02-20 09:49

Johannesburg – 'n Grondwetkenner het 'n beroep op die regering gedoen om 'n referendum te hou oor die e-tolprojek, is Woensdag berig.

Prof. Marinus Wiechers het aan Beeld gesê 'n referendum oor dié omstrede kwessie sal bewys dat die regering belangstel in die mense se opinie in die saak.

"Dit is nodig vir die regering om 'n referendum te hou, veral omdat die grondwet voorsiening maak daarvoor."

Hy het gesê hoewel die grondwet voorsiening maak daarvoor, is daar geen regulasies wat voorskryf hoe 'n referendum in Suid-Afrika gehou moet word nie.

"Mense in Gauteng het gekla dat daar nie publieke konsultasie oor die kwessie was nie. 'n Referendum sal die mees demokratiese manier wees om 'n uitkoms te bepaal," het Wiechers gesê.

Maplakala Motloung, woordvoerder vir die Gautengse premier se kantoor, wou nie kommentaar lewer oor of die regering 'n referendum sal oorweeg nie.

Die Bondgenootskap Teen Stedelike Tol (Outa) se aansoek om verlof tot appèl teen die uitspraak van die e-tolstelsel is op 25 Januarie in die Pretoriase hooggeregshof toegestaan.

'n Datum vir die appèlsaak is nog nie vasgestel nie.
     
– Volg Nuus24 op Twitter

- SAPA