SA media ‘dwing’ ANC na eie koerant, sê Manyi
2011-03-28 07:38
Die media is volgens Jimmy Manyi, regeringswoordvoerder, besig om die regering “te dwing” om sy eie, staatsbeheerde dagblad te skep.
Manyi het gister gesê die media, veral koerante, se selektiewe dekking van die regering se werk het hom genoodsaak om sy kommunikasie-en-inligtingsdiens (GCIS) se tweemaandelikse tydskrif, Vuk’uzenzele, van volgende maand as ’n maandelikse koerant en teen Maart volgende jaar tweeweekliks uit te gee en binnekort “selfs in ’n dagblad te omskep”.
Die tydskrif, waarvan Manyi geen geheim maak dat dit ’n regeringsmondstuk is nie, word van einde volgende maand ’n maandelikse koerant waarvan twee miljoen afskrifte gedruk sal word. Dit sal van Vuk’uzenzele die publikasie met die grootste sirkulasie in die land maak.
Manyi het gister bevestig die produksie van die koerant sal sowat R1 miljoen per uitgawe kos.
“Dit word intern (deur die GCIS-begroting) gefinansier.
“Daar’s niks hiermee fout nie, want die regering het ’n plig om mense in te lig; dis deel van dienslewering.”
Die koerant gaan dus nie staatmaak op advertensiegeld as inkomstebron nie. Hoewel advertensies die las op belastingbetalers sal verlig, kan dit volgens Manyi ruimte in die koerant wegvat.
Manyi meen die media dek “net twee uit elke tien kwessies” wat die regering se werk betref en veral koerante “sensor” die inligting wat die regering uitgee.
“Die media gebruik hul diskresie en hoe meer hulle aanhou om oor twee uit tien kwessies te berig, hoe meer maak hulle dit vir ons ’n soliede saak om ’n dagblad te hê. Die bal is dus in die media se hande.”
Hy meen “nie eens die helfte” van kwessies wat hy op mediakonferensies ná kabinetsvergaderings weergee, word deur die media gedek nie.
Die GCIS het reeds ’n tender geadverteer vir dié koerant, wat in al 11 amptelike tale beskikbaar sal wees en gratis versprei sal word. Tyrone Seale, ’n voormalige Beeld-joernalis en besturende redakteur van die tydskrif, asook direkteur van GCIS-inhoud, sal dié koerant se redakteur word.
Wilmot James, federale voorsitter van die DA, het gesê hulle is gekant daarteen omdat belastingsbetalersgeld gebruik sal word om die regering se beleidsrigtings te bevorder.
Dr. Pieter Mulder, VF+-leier, het gesê “daar’s ’n groot verskil tussen ANC-propaganda en staatsinligting”.
“Die ANC het tot nou toe dié duidelike onderskeid oorskry, so ek’s baie skepties.”
Eerw. Kenneth Meshoe, ACDP-leier, meen dié koerant is ’n “oorwinning vir die SA media”.
“Die regering sien duidelik hy kan nie die media manipuleer of beheer nie, so hy word genoodsaak om sy eie koerant-mondstuk te publiseer.”
- Volg Nuus24 op Twitter.
- Beeld