SA-man vas ná gru-ongeluk in Zambië

2013-02-09 08:30

Johannesburg – 'n Suid-Afrikaanse plaasbestuurder is Vrydag in Zambië in hegtenis geneem in verband met 'n ongeluk naby Lusaka waarin 51 mense gesterf het, het die polisie gesê.

"Hy staan tereg op aanklag dat hy weens gevaarlike bestuur die dood van 51 mense veroorsaak het," het Elizabeth Kanjela, woordvoerder, gesê.

Die 74-jarige Abraham Van Eeden het na bewering probeer om 'n vragmotor verby te steek toe hy besef daar is aankomende verkeer, het Kanjela gesê.

"Hy het besef daar is 'n aankomende vragmotor. Hy het probeer uitswenk, maar hy het die vragmotor getref. Die bestuurder van die vragmotor het beheer oor sy voertuig verloor en teen die bus gebots."

Pres. Jacob Zuma het Vrydag sy medelye met die inwoners van Zambië betuig.

"Ons harte gaan uit na die families en vriende van die oorledenes. Ons gedagtes is met die beseerdes en ons wens hulle 'n spoedige herstel toe," het Zuma in 'n verklaring gesê.

Kanjela het gesê sy weet nie wanneer Van Eeden in die hof sal verskyn nie.
    
– Volg Nuus24 op Twitter

- SAPA